CAGAYAN DE ORO CITY-Anaa karon sa kritikal kahimtang ang usa ka trabahante sa Oro Port human kini pusila diha sa Brgy. Macabalan ning syudad kagabii.
Naila ang biktima nga si Pedro Obedencio, 44 anyos nga taga Parola, Brgy. Macabalan sa syudad.
Padulong na unta sa iyang trabaho ang biktima sa dihang gipusil kini sa wala mailang suspek nga sakay sa motorsiklo gamit ang 9MM pistol.
Tulo ka samad-pinusilan sa iyang lawas ug kamot ang naangkon sa biktima, kinsa gitambalan karon diha sa Northern Mindanao Medical Center.
Gisuta pa karon sa kapolisan kon unsay motibo sa pagpusil sa biktima samtang nagpadayon ang ilang pagpangita sa wala mailang suspek.
