Giklaro sa pangulo sa Office for Senior Citizens Affairs (OSCA) nga si Victor Lagang nga walay natala nga kaso sa ghost pension o pag-release og pondo ngadto sa mga namatay na dinhi sa dakbayan sa Cagayan de Oro.
Dugang pa niya, hugot ang pagmonitor sa buhatan ug gipahimangnoan usab ang mga staff aron masigurong walay mahitabong anomaliya sa pag-apod-apod sa maong hinabang.
Matod pa ni Lagang, bisan pa og wala pa kini nahitabo sa ilahang area, padayon gihapon ang koordinasyon kauban ang Department of Social Welfare and Development (DSWD) aron mapugngan ang bisan unsang klase sa korapsyon.
Gipasabot usab niya nga kinahanglan extra careful ang tanan aron malikayan ang mga reklamo ug masigurong hapsay ang pagdala sa programa.
