CAGAYAN DE ORO CITY-Suportado ni City Mayor Oscar Moreno ang lakang pakisusi nga gihimo sa konseho kabahin sa kasiguruan sa suplay sa panubig sa dakbayan.
Kini human unang mibati’g alarma si Moreno dihang apektado ang 25-mil ka konsumante sa COWD sa unang distrito sa syudad tungod sa minus nga panubig sa miaging Setyembre hangtod Oktubre ning tuiga.
Miingon ang mayor nga angay lamang nga manginlabot ang konseho alang sa interes sa katawhan sa syudad.
Giawhag usab ni Moreno ang COWD ug Rio Verde ingon man ang MetroPac nga magbaton sa maayong transition period sa oras nga hukman na sa korte ang termination of contract sa Disyembre ning tuiga.
Samtang may nakit-an nang laing local water provider ang konseho nga may kapas makahatag sa bastante ug barato nga suplay sa panubig sa syudad.
Kini human nagtinguha paghulip na ang COWD sa Rio Verde isip supplier sa tubig subay sa mando sa disallowance findings sa Commission on Audit.
Namahayag si Kag Bong Lao,chairman sa public utilities committee sa konseho nga nagpadayag usab sa interes ang Cagayan de Oro Water Technologies and Development Corp nga mo-suplay sa COWD.
Miingon si Lao nga balor 8 pesos per cubic meter lamang ang baligya sa tubig nga mas ubos sa demand 16 pesos ug 35 sentabos sa Rio Verde ug laing 16 pesos gikan sa MetroPac.
Kaya usab sa maong bag-ong kompanya mosuplay sa 500 thousand cubic per day demand sa syudad gamit ang ilang moderno nga kagamitan.
Dugtong niini,abli ang COWD sa pagsulod sa laing kompanya nga may kapas mo-suplay sa panginahanglan sa panubig dinhi sa dakbayan.
Kini bisan nga wala pa sa ilang plano nga makig-kontrata sa laing water provider company gawas sa pirmado na nila
nga joint venture sa MetroPac nga nakabase sa kauluhan.
Miingon si COWD General Manager Engr Rachel Beja nga suportado usab nila ang kagustuhan sa konseho sa tuyo nga dili ma-monopolize ang pag-suplay sa tubig sa usa lamang ka water provider.
Nasayran nga nagpalit ang COWD sa 10 pesos ug 45 sentabos kada-per cubic meter nga tubig gikan sa Rio Verde
sulod na sa napulo ka tuig.
