CAGAYAN DE ORO CITY – Gihulatan pa sa kapolisan ang resulta sa otopsiya sa patay’ng lawas sa usa ka pulis sa Laguindingan, Misamis Oriental.
Naila ang biktima nga si Police Chief Master Sargeant Dandie Eslapor, 46-anyos ug molopyo sa Brgy Poblacion sa maong lungsud.
Si Eslapor ang nadestino sa Aviation Security Unit-10 nga nakabasi sa Laguindingan International airport compound.
Gibutyag ni Misamis Oriental Police Provincial Office spokespeson Capt Ludivina Fuentes nga igo na lang nakita sa iyang kauban ang biktima nga nagbuy-ud diin naligo sa kaugalingong dugo sa miaging gabii.
Subay sa paghiling sa SOCO -10,may igo-pinusilan ang biktima sa iyang apapangig lahos sa iyang agtang diin nagresulta sa iyang kamatayon.
Nakita sa lugar ang issued firearm niini nga 9mm ug basyo sa bala.Hisayrang ang maong pulis, bag-uhay pang nakadawat sa talagsaong pasidungog gikan sa Police Regional Office 10 sa Camp Alagar ning syudad.(Bombo Zen Cahatol).
