CAGAYAN DE ORO CITY – Gitunulan sa taas nga pasidungog sa National Police Commission 10 ang liderato sa Police Regional Office 10 nunot sa outstanding performance niini sa milabay’ng piliay sa Northern Mindanao.
Kini human personal nga gipadayag ni Napolcom 10 regional director Atty. Pablito Abad Jr ang pagpasalamat sa mga pulis ubos sa liderato ni PRO 10 Director Brig Gen Jaysen De Guzman.
Miingon si Abad nga dili makab-ot ang malinawon nga piliay nga gipanguluhan sa Commission on Elections kung wala usab paluyuhi sa mga govt aligned agencies diin naglakip sa PNP.
Sa milabay’ng piliay,nakatala lang ang PRO 10 sa simple nga panaglalis sa political supporters sa pipila ka mga kandidato gikan sa Lanao del Norte.
Dugtong niini,giingong nakadugang kini sa kadasig sa PRO 10 nga gihataga’g pag-ila ang mga sakripisyo sa mga pulis sa mismong pagsulod sa rehiyon sa election period hangtod nga napahigayon ang piliay sa milabay’ng Mayo 12 ning tuiga.
Miingon si De Guzman nga dili molampos ang pagka-epektibo sa ilang security implementation plan kung wala usab hatagi’g suporta sa katawhan ang maong katuyuan.
Siya miingon nga gihatagan sa Kampo Alagar sa pagsaludo ang tanan nilang mga pulis.
Kini gumikan sa dili tiaw’ng sakripisyo ilabina kadtong nadestino sa Lanao del Sur nga halos kada-eleksyon adunay mahitabong failure of elections gumikan sa kainit sa bangi sa politika.
