CAGAYAN DE ORO CITY – Daw nahimong batang gamay ang eksena ni Office of the Vice President Chief of Staff Atty. Zulieka Lopez nga dili gusto magpabiya ni Vice Pres Sara Duterte ug Senador Ronald de la Rosa.
Kini human basahi ni CIDG chief Brig Gen Nicholas Torre III sa mando sa House of Representatives Sergeant at Arms nga angayang ibalik na si Lopez sa Veterans Memorial Medical Center gikan Saint Luke’s Medical Center.
Madungog ang pagdanguyngoy paghilak ni Lopez samtang nanggunit kang VP Sara kay nahadlok kini kon unsaon sa mga pulis ug kon asa dad-on gikan sa VMMC.
Si Lopez ang naglisod pagginhawa sulod sa lawak nga gipahimutangan kaniya sa kamarabaha kaganihang kadlawon kay gusto ibalhin ang kustodiya sa Women’s Correctional Institution sa Bureau of Correction sa Mandaluyong City.
Si Lopez ang gi-target pugaon pag-ayo sa komitiba ni Cong. Joel Chua kabahin sa mga gipatoong waldas nga paggasto sa pondo sa OVP kay dili nila madiktahan si VP Sara.
Una nang gibulgar ni VP Sara nga adunay mga higayon nga paghuman sa mga imbestigasyon batok kaniya,nangayo’g pasensiya ang mga kongresista kay alang kanila nagkinahanglan sila sa pondo nga magamit sa sunod eleksyon.
Nakaabot usab ang mga impormasyon sa Bombo Radyo nga kon ma-cite for contempt ang usa ka resource person sulod sa pila ka adlaw,grabe ang mahitabong negosasyon aron sunod nga pag-atubang sa hearing molahi na ang ipangsulti ug batok na sa usa ka personalidad.
Hisayrang sa bulag nga hearing sa quadropole committee,kalit mihumok si former PCSCO manager ug retired Police Col. Royina Garma kay gi-cite for contempt ug giduot na si kanhi Pres Rodrigo Duterte sa isyu sa cash reward system kabahin sa war on drugs policy.
