CAGAYAN DE ORO CITY – Dismayado si Ozamiz City Police Major Jovie Espenido sa hinay nga dagan sa patong-patong nga kasong giatubang ni Ricardo “Ardot” Parojinog.
Gipaggawas ni Espenido ang iyang kadismaya kon nganong sa Kampo Crame gi-detain si Parojinog.
Siya miingon nga mapadali ang pagdungog ug pagdesisyon sa kaso kon gibilanggo kini sa Ozamiz City.
Gani, gi-kwestyon usab ni Espenido ang pagpasagad sa ubang mga pulis sa kaso nga giatubang ni Parojinog.
Una nang gidala si sa Ozamiz City Regional Trial Court alang sa iyang arraignment sa kasong pagpangawat lamang sa kuryente.
Si Ardot nga giingong miembro sa Parojinog Drug Syndicate ang dunay pito ka kasong kriminal nga pending sa korte sa Ozamiz City.
Samtang gi-depensa ni Police Regional Office o PRO-10 spokesperson Lt Col Mardi Hortillosa ang pagbalhin kang Parojinog gikan sa Ozamiz City Jail pabalik sa Kampo Krame.
Kini human unang gibasahan sa kasong pagpangawat sa koryente si Parojinog sa korte sa Ozamiz kagahapon sa buntag.
Miingon si Hortillosa nga wala pasagdi sa PNP ang pakigbisog ni Espenido sa pagbangga sa grupong Parojinog apan naka-monitor niini ang PRO-10 officials.
Gani,hugot nga seguridad ang gihatag kang Parojinog sa iyang pagtambong sa case arraignment aron dili ma-rescue sa iyang mga sakop o mapatay nga makaapektar sa giatubang nga mga kaso sa korte.
