CAGAYAN DE ORO CITY- Supak ang mga residente sa kagustuhan ni Pres Rodrigo Duterte nga ibalhin sa Iloilo City si C/Insp Jovie Espenido gikan sa Ozamiz City .
Kini human nabalaka ang mga residente nga sa pagbiya ni Espenido subling mobalik ang kriminalidad sa ilang lugar ingon man ang kaso sa illegal nga droga.
Samtang, gikasubo usab sa Ozamiz City RTC Branch 15 ang re-assignment ni Espenido.
Matud ni Ozamiz City RTC Branch 15 Clerk of Court Atty Jullimie Guanco nga gusto man nila nga pugngan si Espenido apan wala sila’y mahimo tungod kay kamanduan kini ni Pres Duterte.
Gidayeg niini ang katakos ug kaisog ni Espenido sa pag-neutralize sa pamilyang Parojinog.
Samtang sa pikas bahin,nag-inhibit ang usa sa duha ka huwes sa Ozamiz City Regional Trial Court sa paghupot sa mga kasong kriminal nga gipasaka batok kang Bise Mayor Ozamiz Nova Princess Parojinog ug sa iyang igsoon nga si Reynaldo Parojinog Jr.
Si Guanco miingon nga nag-inhibit sa paghupot sa kaso si Ozamiz City RTC Branch 35 Judge Salome Dungog tungod sa iyang compulsory retirement ning bulana.
Tungod niini, wala nay oras ang huwis nga maaksiyonan ang kaso nga nagkinahangla’g atensiyon ug delicadeza usab aron mawala ang pagduda sa duha ka partido.
