CAGAYAN DE ORO CITY – Nabawian sa mga pulis sa P1.2 milyones nga balor sa gitoohang shabu ang duha ka suspek nga nadakpan sa drug buy bust operations sa Brgy Marawi Poblacion,Marawi City,Lanao del Sur.
Namahayag si Lanao del Sur Police Provincial Office Director Col. Robert Daculan nga maoy nadakpan sa iyang mga pulis kuyog ang Task Force Marawi sa Philippine Army ang mga suspek nga sila alyas Nor nga taga-Brgy Lilod Saduc ug Yosuph nga residente usab sa Brgy Raya Saduc sa maong syudad.
Nabawian ang mga dinakpan sa 150 gramos nga gitoohang shabu nga dunay P1.2 million nga estimated street value.
Nakuha usab sa mga otoridad gikan sa mga dinakpan ang buy bust money ug pipila ka gitoohang online parcels.
Mag-atubang sa kasong pagsupak sa Comprehensive Dangerous Drugs Act of 2002 ang nahisgutang mga dinakpan nga detinado sa pasilidad sa kapolisan.
