CAGAYAN DE ORO CITY – Lubo-hangyo si Tagoloan Mayor Atty Nadya Emano – Elipe sa tag-iya sa yuta nga unta makabalik pagtukod sa ilang mga balay ang mga biktima sa dakong sunog sa Zone 2,Brgy Poblacion,Tagoloan,Misamis Oriental.
Kini human naugdaw ang 26 ka balay gumikan sa kalit nga pag-ulbo sa dakong sunog sa maong lugar mismo sa semana santa.
Namahayag ang mayoriya nga gihimo niya ang pag-apelar kay wala pa sila’y relocation program nga maoy pahimutangan alang sa mga maapektuhan sa bisan unsa nga trahedya nga moigo sa lungsod.
Una nang temperaryo gipahimutang ang mga nasunugan sa ilang municipal dome samtang gihikay ang mga dokumento aron matunulan sa ayudang pinansyal ug ubang kaayuhan gikan sa gobiernong lokal.
Unang milugwa ang impormasyon nga dunay nagdula’g lighter ug may bersyon usab nga may charger sa celphone nga mibuto kay wala gilayong maibot sa tag-iya niini sa usa sa mga balay nga nasunog.
Apan sulti sa mga bombero nga misusi sa hitabo nga padayon pa ang ilang imbestigasyon aron masuta ang rason sa sunod nga midamyos sa 20 ka balay nga dunay 1.3 milyones pesos nga initial nga structural damage.
Hinoon,walay kinabuhi sa tawo nga nakalas o samaron atol sa maong hitabo.
