CAGAYAN DE ORO CITY – Gi-aprobahan sa mayoriya sa Sangguniang Panlalawigan ang resolusyon nga nagtugot kang Misamis Oriental Gov Bambi Emano nga makapangutang sa Development Bank of the Philippines sa balor 1.5 bilyones pesos ning tuiga.
Sa boto nga 10-2, mahimo nang makahulam ang si Emano sa salapi diin gamiton sa mga proyekto niini sa lalawigan.
Gibutyag ni SP Board Member Dexter Yasay, chairman sa committee on ways and means nga gamiton ang maong salapi sa pagpalambo sa nagka-gidlay nga provincial jail ug ubang mga proyekto sa lalawigan.
Samtang idangop sa minoriya sa Sangguniang Panlalawigan o SP sa DILG ang lakang nga gihimo sa majority board members nga mi-aprobar sa resolusyon nga mangutang si Emano sa 1.5 bilyon pesos ning tuiga.
Kini aron gamiton alang sa pagbag-o sa provincial jail ug pagpamalit sa ubang kabtangan alang sa kapitolyo probinsyal.
Miingon si Vice Gov Jigjag Pelaez nga gusto lamang nila matin-awan ang angayang gamitan sa maong pondo.
Una niini,gitugtan sa 10 ka board members si Emano maka-loan sa Devt Bank of the Philippines samtang duha lamang ang misupak niini sa ilang SP session.
