CAGAYAN DE ORO CITY – Dili kumbinsido ang taas nga opisyal sa Commission on Elections o Comelec-Misamis Oriental nga tinood ang pasangil nga nalambigit sa kurapsyon ang ilang pipila ka top officials nga nakabase sa kauluhan.
Kini human unang gibulgar ni Sagip party-list Rep. Rodante Marcoleta nga dili moubos sa uno bilyones pesos nga salapi nga nagsilbing komisyon ang nabalhin sa mga bangko nga naglakip sa nakabase sa South Korea padulong sa 49 ka offshore accounts.
Matud ni Comelec Provincial Election Supervisor Atty Carlito Ravelo nga tataw kini nga demolition job batok sa ilang chairman nga si Atty George Garcia tungod sa pagpabor sa South Korean company Miru System nga maoy mihulip sa Smartmatic sa automated elections sa nasud.
Miingon si Ravelo nga ensakto ang gihimo ni Garcia sa pagdumala sa ahensiya ug kini sihag sa tanang mga kalihukan sukad gitudlo ni Pres Bongbong Marcos.
Nagtoo kini nga dunay mga partido nga naligsan hinungdang gihimua’g demolition job aron gub-on ang kredebilidad ni Garcia.
Sa pagkutlo ning balita,gilugwa na ni Garcia ang waiver aron boluntaryo nga masusi ang iyang bank accounts ug masayran kon nakapangalan kaniya ang gipasiatab ni Marcoleta.
