CAGAYAN DE ORO CITY – Nahurot kasunog ang 15 ka balay diin 13 niini ang totally damaged diha sa Lapaz Dos,Brgy Lapasan ning syudad.
Gitumbok ni BFP investigator SFO1 Lino Lauson nga nagsugod ang kalayo sa ikaduha nga andana sa pinuy-anan nga gipanag-iya ni Danilo Gomeran nga paspas mikuyanap sa mga silingan.
Dili pa nila masuta kon unsay hinungdan sa sunog diin dunay structural damage nga uno milyon pesos.Hinoon,walay bisan usa ka tawo nga samaron o namatay sa maong hitabo.
Samtang nagayo’g tabang sa mga tawo nga dunay malumong kasingkasing ang mga biktima sa dakong sunog ning syudad.
Kini human daghan kanila ang walay nadala nga kabtangan dihang paspas nga mikaylap ang kalayo sa ilang mga pinuy-anan.
Miingon ang biktima nga si Victoria Granada nga unta dili pasagdan sa gobierno ug may mga tawo nga motabang kanila aron makabalik sa ilang pinuy-anan.
Dugtong usab niini,gilayong gipaabot sa CSWD-Cagayan de Oro ang pasiunang tabang sa mga biktima.
Miingon si City administrator Teodoro Sabugaa nga ibalik niini ang iyang mga personahe sa evacuation center.
Kini aron pagkuha sa kumpleto nga detalye alang sa cash assistance ngadto sa mga biktima.
