CAGAYAN DE ORO CITY – Gilugwa na ang P1-Milyon pesos nga reward money sa Zamboanga Provincial Government sa makatudlo kung asa nagtagu-tago ang mga kidnappers sa magtiayong Allan Arthur ug Welma Paglinawan Hyrons.
Sa pakighinabi sa kapulisan kang Rosalie Destiero, caretaker nga nakasaksi sa pagdagit sa magtiayon, iyang gitug-an nga ang usa sa mga midagit nagbaton sa taas nga height, puti-on, niwang ug dunay mga armas.
Gibutyag sab niini nga muabot sa lima ka tawo ang midagit sa iyang mga amo.
Gani, nalooy sila sa pagbunlot sa mga armado sa ilang mga amo kay ila kining giguyod pasakay sa ilang getaway nga pumpboat.
