CAGAYAN DE ORO CITY – Nasikop sa entrapment operation sa National Bureau of Investigation-10 ang driver ug duha ka helper sa van nga gikargahan sa balor 10 milyon pesos nga imported nga sigarilyo gikan Malaysia o Indonesia nga giagi sa backdoor sa Zamboanga ug gipasulod dinhi sa syudad.
Kini human nakumbinser sa tropa NBI ang utok sa maong kalihukan nga magbaton sa transaksyon sa Brgy Lumbia ning dakbayan sa miaging gabii.
Gibutyag ni NBI 10 Operations Executive Officer 4 Atty Nolan Gadia nga nasuta nga ang maong mga sigarilyo ang walay BIR stamps ug klaro usab nga wala mobayad sa excise tax sa gobierno.
Nagdumili una si Gadia pagtug-an sa pangalan sa mga dinakpan samtang gipangita pa ang mismong target kay nakasibat sa maong operasyon.
Samtang gikasuhan na sa NBI 10 sa pagsupak sa national revenue code ang tulo sa upat ka suspek nga utok sa pagpalusot sa minilyong balor sa ismagol nga sigarilyo dinhi sa syudad.
Kini human nasuta nga ilegal ang 74 ka master cases nga puno sa Port cigarette nga nakasulod sa syudad pinaagi sa pagpalusot niini agi sa backdoor sa Zamboanga gikan sa silingang mga nasud sa Asya.
Gibutyag ni Gadia nga kasamtangang detinado tulo ka wala una hinganli sa publiko nga mga suspek samtang gihulat ang findings sa piskalya sa ilang giduso nga kaso kagahapong adlawa.
Nagdumili usab ang mga suspek nga pulos Muslim-Tausog sa paghatag komento sa ilang pagkasikop.
