Nasanta sa Manticao Municipal Police Station ang mubalor sa P112,000 mineral ore nga gitoohang gikan sa ilegal nga pagmina-mina sa kabukiran sa Barangay Upper Malubog, Manticao, ug Barangay Limonda, Opol, Misamis Oriental.
Ang mga personahe sa Manticao Municipal Police Station mihimo’g monitoring sa mga kalihokan sa illegal mining sa kabukiran sa Barangay Upper Malubog, nga misangpot sa pagkadiskubre ug pagkumpiska sa 44 ka sako sa mineral ores nga gituohang gikan sa Barangay Limonda, Opol.
Sa unang operasyon sa Purok 5, Upper Malubog, 20 ka sako ang nakuha nga nagkantidad og ₱50,000, samtang sa ikaduhang operasyon sa Purok 4, 24 ka sako ang nakumpiska nga nagkantidad sa ₱62,000 nga tanan gipangbiyaan sa lugar.
Ang mga nakumpiskar nga minerales temporaryong gidala sa Manticao MPS alang sa dokumentasyon ug pag-amping, ug igaturn-over kini sa Mines and Geosciences Bureau (MGB) sa DENR sa Puntod, Cagayan de Oro City para sa hustong beripikasyon ug disposisyon.
Ang mga responsable sa maong mga sako posibleng atubangon ang kaso ilawom sa Republic Act No. 7942 (Philippine Mining Act of 1995).
