CAGAYAN DE ORO CITY – Gisunog sa PDEA-10 kuyog ang PNP nga sinaksihan gikan sa hudikatura ang balor 14 milyones pesos nga drogang shabu ug marijuana nga nahukman sa drugs court dinhi sa Northern Mindanao.
Miingon si PDEA 10 regional director Jigger Montallana nga gihimo nila kini isip pagsanong sa sugo sa balaod aron dili na mabalik sa pagbaligya diha sa mga drug user.
Gihimo ang pagsunog sa minilyong balor sa ilegal nga droga sa pasilidad sa Cosmopolitan Funeral Homes ning syudad kagahapong adlawa.
Dugtong usab niini,gusto ni RTC Branch 23 Presiding Judge Arthur Abudiente nga mabalik ang silot-kamatayon batok sa mga konbiktado sa pagbaligya sa ilegal nga droga dinhi sa nasud.
Kini maoy gipabati sa huwes samtang gisaksihan ang pagsunog sa sobra 12 milyones pesos nga shabu ug marijuana nga nahukman sa mga korte nga naghawid niini.
Miingon si Abudiente nga gusto niya mabalik ang istilo kaniadto ni kanhi Pres Ferdinand Marcos Sr diin dunay usa ka langyaw nga gipaupos sa fire squad tungod sa kalambigitan sa ilegal nga droga sa nasud.
