CAGAYAN DE ORO CITY – Nabawian sa Police Regional Office 10 pinaagi sa tropa ni Lanao del Norte Police Provincial Office ang suspected smugglers nga utok pagpalusot sa smuggled cigarettes sa magkalahing lungsod sa Lanao del Norte.
Kini resulta sa gipalig-ong kampanya sa Philippine National Police pinaagi ni General Rommel Marbil nga nationwide anti-smuggling operation aron tabangan ang Bureau of Customs nga mapugngan ang paspas nga pagpanglusot sa mga kontrabando nga dako’g alkanse sa kinitaan ug ekonomiya sa kagamhanan.
Gibutyag ni PRO 10 spokesperson Major Joann Navarro nga unang nadakpan sa tropa sa 2nd Provincial Mobile Force Company ang usa ka alyas Jomar nga nasita nga nagmaneho’g sakyanan gikan Zamboanga City nga nagkarga sa daghang kinarton nga mga sigarilyo sa Barangay Bansarvil 1,Kapatagan.
Miingon si Navarro nga sa laing operasyon sa sa 2nd PMFC,nakasapon na usab kini sa laing mga kinarton nga mga sigarilyo nga biniyaan sa daplin sa dalan sa Brgy Sugod,Sultan Naga Dimaporo.
Sa maong mga operasyon,sobra 2.48 milyon pesos ang kantidad sa mga kompiskadong mga pekeng sigarilyo.
Dugang ni Navarro nga susamang adlaw, naglusad pa sa dugang operasyon ang ilang lower units diin anaa sa 286 ka kahon sa mga sigarilyo ang nakompiskar nga gibiyaan kilid sa lapyahan sa Brgy Sigayan sa susamang lungsod.
Subay sa kuwentada sa Bureau of Customs Sub-Port sa Iligan City, sobra 11 milyones pesos ang kantidad sa maong joint operations sa SND Municipal Police Station, 2nd PMFC ug Maritime Police Station.
Misumada sa sobra 13 milyones pesos ang kantidad sa mga sigarilyo nga nadala sa mga pulis ug gi-kustodiya sa BoC-Sub Port Iligan City.
Hisayrang sukad Enero hangtod ning adlawa,bana-banang 40 milyones pesos na ang kantidad sa smuggled cigarettes nga nabawi sa PRO 10 palibot sa Northern Mindanao nga tanan gihuptan na sa BoC.
