CAGAYAN DE ORO CITY – Mitala na sa 14.7 bilyon pesos nga economic losses ang mga patigayon nga nakabase sa rehiyon.
Kini epekto sa krisis nga dala sa coronavirus disease nga miigo sa Northern Mindanao.
Miingon si NEDA asst regional director Leonila Cajarte nga anaa sa 9-mil 672 ka balay-patigayon ang apektado diin daghan niini ang pugsanon nga nagsira.
Gibutyag ni Cajarte nga may mga negosyo usab nga temporaryo una nga nagsira samtang ang uban pabiling abli apan giminusan ang ilang mga trabahante.
Dugang sa opisyal nga anaa na sa halos 2-mil 700 ka trabahante sa maong mga establisimiento ang direktang apektado sa pandemya.
Samtang kumpiyansa si City Mayor Oscar Moreno nga makabangon pagbalik ang nahugno nga ekonomiya sa Northern Mindanao.
Kini bisan kon nagsaka ang ihap sa mga trabahante nga nawad-an sa trabaho ug nagka-dako ang alkanse sa mga negosyo sa rehiyon.
Miingon si Moreno nga nabantog ang rehiyon nga nagbaton sa katawhan nga makamao mobangon gikan sa mga dagko nga pagsulay.
Giangkon sa mayor nga may mga nagsira nga mga patigayon apan mas misamot unta kalisod ang katawhan kon gipatuman pa niini ang lockdown sa syudad tungod sa bayrus.
