CAGAYAN DE ORO CITY– Nakompiskar ang 16 ka pakete sa suspected shabu nga dunay P170,000 nga street value sulod sa duha ka lawak nga gipuy-an sa mag-igsoong Tagarda sa Tagarda Compound sa Gumamela Extension Barangay Carmen ning syudad.
Gibutyag ni PDEA regional director Willkins Villaneuva gisilbi nila ang search warrants batok nila Gregor, 35 ug Von Clienton, 27 anyos pulos residente sa maong dapit.
Gitumbok ang duruha nga high value targets kay nagsilbi kining supplier sa druga sa ilang brgy ug samtang nanarbaho kini isip sekyu sa Kapitolyo Misamis Oriental ug sa mismong City Hall sa syudad.
Hinoon, sa pagdakop kanila, dili na sila konektado sa duha ka buhatan sa gobyerno.
Samtang emosyonal si Misamis Oriental Provincial Jail warden Dominador Tagarda sa pagdakop sa iyang mga anak sulod sa Tagarda Compound, Brgy Carmen ning syudad.
Miangkon si Tagarda nga nakadungog siya sa sulti sa ilang mga silingan nga pusher ang iyang mga anak, apan gihimakak niini nga nakakita siya nga nagkupot sa mga shabu ang mga suspek.
Hinoon, human nga nakadungog siya sa mga balita nga kompirmadong gapamaligya ang iyang anak, wala siya magkulang sa pagpadumdom kanila isip usa ka amahan.
Nago-ot usab ang dughan ni Tagarda sa pagsulti nga gasukol ug wala gihatagan sa importansya sa iyang mga anak ang mga panihumdom.
