kapin sa usa ka milyon ka pesos nga kantidad sa giingong smuggled nga mga sigarilyo ang nasakmit sa kapolisan sa 3 ka managlahing operasyon nga gihimo sa Lanao del Norte ug Misamis Occidental.
Subay sa taho sa Police Regional Office 10, mikabat sa 1,001,600 pesos ang kinatibuk-ang kantidad sa mga kontrabando nga nakuha sa awtoridad gikan Hulyo 21 hangtod Hulyo 22, ning tuiga.
Samtang, 4 ka mga indibidwal usab ang nadakpan sa maong mga operasyon diin ang uban nakuhaan pa og mga gitaguan nga compartment sa ilang mga sakyanan.
Gawas pa niini, gibutyag usab ni Police Brigadier General Christopher N. Abrahano nga padayon nilang palig-onon ang mga checkpoint ug intelligence-driven operations batok sa iligal nga pamatigayon sa rehiyon.
Tungod niini, gihatagan og pasidungog sa maong opisyal ang tanan nga nagkadaiyang yunit sa kapolisan tungod sa ilang hiniusang paningkamot ug hugot nga pagbantay sa mga utlanan sa Amihanang Mindanao.
