Milampus ang Regional Special Operations Unit (RSOU) 10, kauban ang Bureau of Customs (BOC), sa pagsanta sa mga ismagol nga mga sigarilyo sa gikasa nga operasyon sa Valencia City, Bukidnon.
Mukantidad sa P2,280,000 ang ilang nakompiskar nga mga kontrabando.
Una niini, nakakuhag validated report ang mga operatiba sa RSOU 10 ug Valencia City Police Station, nga adunay mga smuggled nga sigarilyo nga gitaguan sulod sa Grandmeadows Subdivision, Purok 4-B, Barangay Batangan.
Gilayong nakigkoordinar ang mga operatiba sa Bureau of Costums (BoC) ug sa mga opisyales sa barangay aron makompiskar ang mga nasapon nga mga ilegal nga produkto.
Lakip sa nakompiskar ang 10 cellophane packs sa “TITAN” brand; 8 kahon sa “TITAN” brand; 38 kahon sa “GROW” brand
ug usa ka kahon sa “VESS” brand cigarette.
Ang inventory gihimo sa lugar nga gitambongan sa Barangay Official sa Brgy. Batangan ug mga representante sa BOC.
Sa pagkutlo ning balita, temporaryong gitago sa Valencia City Police Station ug igaturn-over sa BOC ang tanan nakompiskar alang sa hustong disposisyon.
Nagpadayon ang follow-up investigation aron matino ang tinubdan sa kontrabando ug aron madakpan ang suspek nga naila lamang sa alyas “Abdul,” residente sa Iligan City, nga hangtod karon wala pa madakpi.
