CAGAYAN DE ORO CITY – Napitol ang laing hugna pagpalusot sa illegal nga sigarilyo nga binuhatan sa mga sindikato nga naglihok sa Cagayan de Oro ug sa Sultan Naga Dimaoro sa Lanao del Norte.
Kini human nalusad sa kapolisan ang anti-smuggling operations batok sa mga tawong natahasan pagpalusot sa magkalahing lokasyon sa syudad ug Lanao Norte.
Namahayag si Police Regional Office 10 spokesperson Major Joann Navarro nga unang nasignit sa tropa sa City Mobile Force Company,City Intelligence Unit ug Cogon Police Station ang 72 packs sa sigarilyo gikan sa nagkadaiyang mamaligyaay ubos sa bisinidad sa mercado publiko.
Siya miingon nga anaa sa 5, 760 pesos ang kantidad sa maong mga sigarilyo ang nabawian sa mga otoridad.
Sa pikas bahin,nasakmit sa Sultan Naga Dimaporo Municipal Police Station ang 51 ka kahon sa pekeng sigarilyo nga adunay 2.4 milyones pesos nga kantidad nga giingong gipanag-iya sa usa ka alyas Mon.
Miingon si Navarro nga nadiskobrehan ang maong mga sigarilyo sulod ug gawas sa payag.
Gitugyan sa kapolisan sa Bureau of Customs ang mga kompiskadong mga sigarilyo alang sa imbentaryo ug pagason sa tukmang kaso batok sa mga nagpalusot niini.
