CAGAYAN DE ORO CITY – Ipasusi ni Misamis Oriental Governor Juliette Uy ang gisudlang joint venture agreement/JVA ni former Provincial Governor Peter Unabia ug A Brown Company Incorporated nga nagkatindad sa P2.5 B ning tuiga lamang.
Kini ang gipalanog ni Uy nunot sa iyang pagsampit nga sudlan sa administrasyon niini ang Public-Private-Partnership/PPP aron makamugna sa bag-ong mga tinubdan sa panalapi nga magamit sa pagtunol-serbisyo sa katawhan sa lalawigan sulod sa tulo ka tuig.
Miingon si Uy nga gitahasan niya ang iyang legal team nga sugdan na ang pagsusi kung nasubay ba sa balaod ang JVA nga gisudlan sa duha ka panig diin porsyon sa kapitolyong espasyo ang gibaligya aron adunay dugang kinitaan ang panaudlanan sa probinsya.
Mipalag ang gobernadora nga wala sukad nadungog nga adunay paglusad sa public consultation sa katawhan sa lalawigan sanglit nakataya ang mga antigo nga katigayunan sa unang mga kaliwat-Misamis non.
Una nang gibutyag ni Unabia sa pagpirmahay sa JVA niadtong Enero nga miagi sa tanang legalidad ang maong transkasyon ug walay naligsan nga mga balaod kabahin niini.
Dumduman nga namugos ang kanhi gobernador kaniadto nga wala niya ibaligya ang kapitolyo-probinsyal sukwahi sa mga batikos gikan sa iyang mga kontra sa politika.
