CAGAYAN DE ORO CITY – Gitakdang kasuha’g kriminal sa National Bureau of Investigation o NBI – 10 ang utok sa nakompiskar nila nga smuggled cigarettes nga balor 2.6 milyones pesos sa national highway sa Brgy Bulua sa syudad.
Kini human gilusad nila ang operasyon diin dunay duha ka batan-on nga nahuptan nila ni NBI 10 regional director Atty. Patricio Bernales nga maoy nagpalusot sa kontrabando.
Siya miingon nga subay sa ilang imbestigasyon,gisulti drayber sa delivery van ug pahenante niini nga usa ka alyas Sam ang nagsugo kanila’g palusot sa inismagol nga mga sigarilyo.
Namahayag si Bernales nga gipapauli ra usab nila ang duruha human makuhai’g batakang impormasyon kay tuyo nila matumbok ang utok sa maong cigarette smuggling.
Sa pagkutlo ning balita, gitugyan na nila sa Bureau of Internal Revenue o BIR ang mga nakompiskar nga mga sigarilyo samtang magsilbing ebedensiya sa ipasaka nila nga kaso batok sa mga sindikato sa maong kalihukan.
