CAGAYAN DE ORO CITY – Misaka na sa 2.66 bilyones pesos ang pagkalugi sa sektor sa turismo sa Northern Mindanao sugod Marso hangtod Hulyo ning tuiga.
Kini tungod sa pagsulod sa coronavirus disease diin nagresulta sa pagpanira sa daghang mga balay patigayon ug ang paglimit sa mga turista makasulod sa rehiyon.
Gibutyag ni NEDA 10 regional director Myla Cariño nga sa turismo,mitala na usab sa 29 bilyon pesos nga economic losses ang probinsya sa maong mga bulan.
Gani,miingon si Cariño nga kon magpabiling wala pa gihapo’y bakuna batok bayrus masinatian nila ang halos 50 bilyones pesos nga alkanse sa rehiyon sulod ning tuiga.
Una na usab nga gikompirmar sa NEDA nga libuang mga trabahante ang nawad-an sa trabaho sukad nagsugod ang pandemya sa nasud.
