CAGAYAN DE ORO CITY – Nabawian sa hiniusang operasyon sa kapolisan ang halos 70 ka suspected illegal drug pushers sa balor 2 milyones pesos nga gitoohang shabu ug marijuana nga droga palibot sa rehiyon.
Kini ang epekto sa sugo ni Police Regional Office 10 Director Brig Gen Ricardo Layug Jr nga ipalig-on pa ang kampanya kontra ilegal nga droga ug ubang mga porma sa kreminalidad sa palibot.
Miingon si PRO 10 spokesperson Police Major Joann Navarro nga ang pagkadakop sa 129 ka personalidad nga naglakip sa halos 70 ka suspected drug pushers ang epekto sa usa ka semana nga operasyon sa lower units sa PNP nga nakabase sa rehiyon.
Siya miingon nga sa aspeto sa droga,anaa sa sobra 297.582 gramos sa gitoohang shabu ug 0.99 gramos of marijuana ang nabawi sa mga operatiba sa PRO 10.
Gawas sa anti-illegal drugs campaign,naglusad usab sa anti-illegal gambling operations diin nadakpan ang 19 ka tawo diin nabawian sa nagkadaiyang ebedensiya sa ilang mga kalihukan.
Napatuman usab lower units operatives sa PNP ang pagsilbi sa warrant of arrest sa korte diin 32 ang nadakpan ug tulo kanila ang most wanted sa balaod.
Nakadakop usab ang kapolisan sa 12 ka personalidad dihang gilusad ang kontra boga diin nabawi kanila ang 13 ka pusil ug dunay laing ang unom nga gitahan.
