CAGAYAN DE ORO CITY – Nakasupak sa price freeze order sa gobierno ang gihimo sa Life Corps Medcare nga usa ka inter-govt agency diha sa Brgy Gusa ning syudad.
Kini human gipaubos sa entrapment operation ang pipila ka personahe sa maong kompanya nga giakusahan nga namaligya’g portable thermal scanners nga sobra kataas ang presyo.
Miingon si Food and Drug Administration -Northern Mindanao Rep Tonette Melgo nga napakyas pag-presentar sa legal nga mga papeles si Lorna Chiong rason gikompiskar ang 203 ka scanners.
Gigamit ang scanners pag-detect sa mga tawo nga tag-as ang body temperature isip pangontra sa coronavirus disease.
Samtang gilaglag karon sa negosyante nga si Chiong ang pipila ka taga- city hall nga maoy ilang kasabot sa transaksyon sa portable thermal scanners diha sa Brgy Gusa sa syudad.
Kini human embarguha sa FDA,DTI,Regulatory and Complaint Board ug NBI-10 ang dul-ag 2-milyon pesos nga kantidad sa scanners gikan sa iyang tindahan.
Miingon si Chiong nga sila ang nag-suplay sa scanners sa city hall isip tabang batok coronavirus disease hinungdan nakurat sila kon nganong gi-entrap sa gobierno.
Namugos kini nga wala siya maghinobra sa presyo apan subay lamang sa giuyuan sa taga- city hall.
Dugtong niini,gibulgar sa National Bureau of Investigation o NBI-10 nga dili 9-mil 500 kada-usa apan kapi’g 300 pesos lamang ang portable thermal scanners nga ilang nakompiskar gikan sa negosyante diha sa Brgy Gusa sa syudad.
Kini human sukwhi sa unang gipamugos ni Lorna Chiong kinsa tag-iya sa Life Corps Medcare nga nakabase sa lugar.
Miingon si NBI regional director Atty Patricio Bernales nga gamiton nila nga ebedensiya ang scanners sa pagkaso batok sa mga suspek.
Gi-aresto sa NBI ang sinaligan ni Chiong nga maoy napaubos sa entrapment operations.
