CAGAYAN DE ORO CITY – Atubangon sa dinakpan ang kasong pagsupak sa Comprehensive Dangerous Drugs Act of 2002 nga ipasaka sa mga operatiba sa Philippine Drug Enforcement Agency o PDEA-Bangsamoro Autonomous Region (PDEA-BAR) sa piskalya sa Marawi City sunod semana.
Namahayag si PDEA-BAR regional director Gil Cesario Castro nga maoy nadakpan sa ilang tropa ang 24 anyos nga si alyas Orak nga nagpuyo sa Brgy Sabala Manao Proper,Marawi City,Lanao del Sur.
Siya miingon nga nadakpan si Orak sa hiniusang operasyon sa ilang tropa kuyog ang mga sakop sa Philippine National Police diin nabawian sa 300 gramos nga gitoohang shabu ug adunay street value nga 2.4 milyones pesos.
Nabawian usab ang suspek sa buy-bust money ingon man mobile phone.
Detinado una sa mini-cell sa PDEA-BAR sa Cotabato City ang dinakpan samtang gihulat ang pagdason sa kasong kriminal sa piskalya sa Marawi City sunod semana.
