CAGAYAN DE ORO CITY, Philippines – Masaligon si Department of Agriculture (DA)-10 Regional Executive Director Jose Apollo Pacamalan nga makab-ot sa Northern Mindanao ang tag-20 pesos nga kilo sa bugas.
Gihimo ni Pacamalan ang pamahayag dihang namugos kini nga posible ang pangadoy ni Presidente Bongbong Marcos nga kunhuran sa presyo sa bugas pinaagi sa pag-improbar sa production system alang sa mga lokal nga mag-uuma sa rehiyon.
Miingon ang opisyal nga dunay formula nga gamiton ang gobyerno aron makab-ot ang pinakabarato nga bugas.
Una, pinaagi sa pagpa-us-os sa cost of production.
Ikaduha, pagpadaghan sa harvest o ani sa mga mag-uuma.
Nagtoo si Pacalaman nga kung sugdan na kini ning tuiga, taas ang tsansa nga sa musunod duha ug tulo ka tuig, mabutang na sa merkado ang tag-20 pesos kada kilo nga bugas.
Gihimong pananglitan sa DA ang target nga production cost sa balor P30,000 per hectare, nga may kapas nga mu-ani sa 5.5 tonelada matag ektarya.
