CAGAYAN DE ORO CITY – Gi-depensa sa city govt ang gi-alokar nga pondo balor 20 milyones pesos alang sa 58 ka dagkong kalihukan sa Higalaay Festival 2025 alayon sa kapistahan sa patron Senior San Agustin ning syudad sa Agosto 28.
Gibutyag sa chief of staff ni City Mayor Klarex Uy nga si Shiela Lumbatan nga dili tiaw ang kadako sa galastuhan sa matag-lusad sa kapistahan kinuyugan sa nagkadaiyang fiesta activities sa syudad.
Siya miingon nga tuyo sa maong mga kalihukan ang pagpasalamat sa laing kapistahan,promosyon sa dakbayan ug paghatag sa daghang kalingawan sa katawhan.
Gipasabot ni Lumbatan nga gusto nila nga maila dili lang sa Pilipinas apan sa ubang bahin sa kalibutan kung unsa ang kalidad,kultura ug pinasahi nga kagikan sa gidagnayan nga city of golden friendship-Cagayan de Oro.
Dumduman nga sa milabay’ng 2024 Higalaay Festival, gigahinan nila sa P15 milyones ang mga kalihukan apan gikulang kini ug mipatong pa sa 28 milyones pesos ang katibuk-ang galastuhan.
Kini ang rason nga gisaka sa city govt sa 20 milyones pesos ang pondo ning tuiga apan bisan niini,gilauman nga mokabat gihapon sa halos 30 milyones ang gikinahanglang salapi.
Kini tungod sa kadaghanan sa mga kalihukan nga konektado sa tinuig nga pangilin sa kapistahan sa dakbayan.
