CAGAYAN DE ORO CITY-Kasuhan na’g hoarding o pagpanago sa mga bugas ang upat ka negosyante nga aktong nasapon sa hiniusang operasyon sa Iligan City.
Kini human nakumpleto na sa task force ang gikinahanglang dokumento ug imbetaryo sa balor 20 milyon pesos nga commercial rice gikan sa upat ka negosyante nga nakabase sa maong lugar.
Miingon si Atty Abdul Dimaporo,district officer sa NBI-Iligan City nga kabahin sa kasuhan sila si Sonia Payan ingon man si Chinese national Yang Jiangzhu nga taga-Cagayan de Oro City ug Johnny Tan sa maong syudad.
Dugang ni Dimaporo nga gitun-an usab nila ang pagsang-at sa kasong rice cartel batok sa tulo ug laing usa ka negosyante nga wala pa panganli gumikan sa maong kasupakan.
Sa pagkakaron,anaa na sa NFA warehouse ang kapi’g 20-mil ka sako sa bugas human ma-ronda sa task force gikan sa tulo ka bodega sa maong mga negosyante sa miaging semana.
