CAGAYAN DE ORO CITY – Nagduda si Citizen Watch for Good Governance o CWGG convenor Atty. Antonio Soriano nga dili ang kakulangon sa pondo ang hinungdan kon nganong gipangayo ni Pres Rodrigo Duterte ang emergency powers sa Kongreso.
Kini tungod kay nagtinguha si Duterte nga idumala ang privately-owned nga public utilities, hospitals ug mga negosyo aron mabatukan ang pagkaylap sa COVID-19 sa nasud.
Siya nagtoo nga dili pa kini ang tukmang panahon aron hatagan sa dugang gahom ang presidente kay mahimo pa siyang makadeklara sa state of calamity o martial law aron makahatag ayuda sa mga apektado sa krisis gumikan sa virus.
Samtang nagtoo si Soriano nga ang mga senador ug congressman lamang ang maka-benepisyo sa P200 billion nga pondo nga makuha niini pinaagi sa gipangayo nga emergency powers ni Duterte.
Gitawag ni Soriano nga dili makiangayonang gihimong pag-aprobar sa mga magbabalaod sa hangyo ni Duterte ilabina nga apektado ang ubang pondo sa mga ahensya gumikan sa himoon nga realignment.
Una nang gisugyot ni Soriano sa gobyerno nga masulbad lamang ang krisis o kakulangon sa mga pasilidad gumikan sa COVID-19.
Kini pinaagi sa pagwagtang sa mga taripa sa mga produkto nga mosulod sa nasud gikan sa laing kanasuran ug e-release ang mga nakumpiskang ekipo sa Department of Health nga anaa sa Bureau of Customs.
