CAGAYAN DE ORO CITY, Philippines – Makatagamtam na sa dugang 23 pesos nga usbaw sa suhulan ang tanan pribadong mamumuo sa Northern Mindanao, sugod Enero 12.
Kini ang gikompirmar sa Department of Labor and Employment (DOLE-X) sa press conference nga gilusad sa milabay’ng semana.
Namahayag si Mylah Faye Aurora Cariño, vice chairperson ug regional director sa National Economic Development Authority (NEDA)-10 nga ang pulos makadawat sa susamang usbaw sa matag adlaw nga suhulan ang non-agricultural ug agricultural workers sugod sa adlaw nga muepekto ang Wage Order, ug laing 12 pesos nga usbaw sa Hulyo 1 alang agricultural workers, lamang.
Kini nagpasabot nga ang minimum wage sa non-agriculture ug agriculture workers pag-abot sa Hulyo musaka na sa P461 alang sa Wage Category 1 ug P446 alang sa Category 2.
Ang Wage Category 1 langkoban sa mga syudad sa Cagayan de Oro, Iligan, Malaybalay, Valencia, Gingoog, El Salvador, Ozamiz, ug mga munisipalidad sa Tagoloan, Villanueva, Jasaan, Opol, Maramag, Quezon, Manolo Fortich ug Lugait.
Samtang ang Wage Category 2, lakipan sa tanan lugar nga wala nanganlan sa Wage Category 1, kuyog ang mga anaa sa retail ug service establishments nga adunay empleyado nga dili mosobra sa napulo.
Namugos ang DOLE-X nga miagi sa sobsob nga konsultasyon ang naaprobahan nga wage hike sa rehiyon.
