CAGAYAN DE ORO CITY – Mitala sa P23 milyones ang initial structural damage sa pagkalamoy sa kalayo sa siyam ka balay ug pipila ka commercial structures sa dalang Nacalaban-Tiano Brothers sa Barangay 20 ning syudad kaganihang buntag.
Miingon si Bureau of Fire Protection District Operation Division head Fire Senior Insp Kyle Bryan Lauzon nga natala kini nga kadak-on sa damyos kay dagkong mga balay nga nasunog ug gigamit usab nga investment structures.
Siya miingon nga nakahiagom usab sa 2nd degree burn ang residente nga si Bernie Diaz gumikan sa hitabo.
Giimbestigaran pa usab sa mga imbestigador sa BFP ang rason sa sunog nga gitoohang naggikan sa ikaduhang andana sa usa sa mga istraktura.
Kini ang ikaduhang sunog nga nahitabo sa sentrong bahin sa syudad sulod lang ning semanaha.
Kini human nalamoy sa kalayo ang halos 20 ka balay sa Brgy 13 sa dakbayan sa miaging gabii.
