CAGAYAN DE ORO CITY -Mi-damyos sa gibana-banang 25-milyones ka pesos ang pagkasunog sa ammunition complex sa 4ID, Philippine Army nga nakabase sa Camp Edilberto Evangelista,Brgy Patag ning syudad.
Matud ni 4th ID spokesman Maj. Francisco Garello Jr nga ilang gibasi ang assessment sa kantidad sa ammunition complex ug mga kagamitan niini ingon man ang nagbusikad nga mga bala.
Samtang gipasalig ni Garello nga dili makabalda ang maong panghitabo sa ilang pagtunol sa serbisyo ilabina ang paghatag seguridad sa publiko.
Una usab nakabalik na sa ilang panimalay ang 43 ka pamilya nga gihikling sa covered court tungod sa pagkasunog ug pagbusikad.
Apan nagpabilin pa sa 4th ID gymnasium ang laing 24 ka pamilyang naapektuhan sa sunog ug gi-atiman sa mga personahe sa DSWD.
Miingon si Garello nga anaa na sa luwas nga kahimtang ang tulo ka sibilyan nga naangol ug nakagawas na sa Camp Evangelista Station Hospital.
Dugang ni Garello nga nagpadayon ang ilang clearing operation sa Magazine 5-Ammonition Complex sa 10th Forward Service Support Unit ug Army Support Command.
Nagpadayon usab ang pagsuta sa Bureau of Fire Protection kon unsay hinungdan sa pag-ulbo sa kalayo.
Dumduman nga gitala sa Bureau of Fire Protection ang duha ka milyon ka pesos ang structural damage sa sunog ug pagbusikad sa ammunition complex.
Kini ang gibutyag ni SFO4 Samson Velarde, hepe sa Kauswagan Fire-Substation atol sa pakighinabi sa Bombo Radyo.Gikompirmar niini nga apil sa mga nagbusikad ang mga bala sa 155mm mortar.
Asoy pa ni Velarde nga nahadlok silang mosulod sa ‘fire scene’ tungod sa mga bala nga posibleng wala pa nakabusikad.
Hisayrang natugaw ang tibuok Cagayan de Oro samtang anaa sa pagtulog ang mga residente gumikan sa maong pagbusikad.
