CAGAYAN DE ORO CITY – Mikantidad na sa sobra P 25.7-M ang balor sa inimbargo nga mga sigarilyong ismagol gikan sa suspected smuggling syndicates nga naglihok sa Northern Mindanao region.
Gihimo ni Bureau of Customs -Cagayan de Oro Port District Collector Alexandra Lumontad ang kompirmasyon nunot sa pagka-kompiskar sa 350 ka reams sa mga sigarilyo nga gipalusot sa Barangay North Poblacion,Guinsiliban,Camiguin.
Miingon si Lumontad nga ang maong nabawing mga sigarilyo nga gisakay sa wing van truck ang dunay balor 280-mil pesos nga estimated market value.
Siya miingon nga sukad naghiusa ang PNP ug BoC paglusad sa kampanya kontra smuggling products sa rehiyon,mitala na sa 25.7 milyon pesos nga balor niini ang nakompiskar samtang daghan na ang nakasuhan.
Dumduman nga kasong pagsupak sa Customs Modernization and Tariff Act ang atunbangon sa mga utok sa sindikatong kalihukan.
Hisayrang sulti pa sa Police Regional Office 10, anaa na sa halos 15 milyones pesos nga smuggled cigarrettes ang nabawi sa ilang mga operasyon samtang laing sobra 2 milyon nga kantidad sa NBI 10 sa miaging semana.
