CAGAYAN DE ORO CITY -Mag-atubang sa kasong pagsupak sa Comprehensive Dangerous Drugs Act of 2002 ang duha ka dinakpan sa tropa sa Regional Drug Enforcement Unit (RDEU 10) sa Kampo Alagar nga unang nabawian sa P3.1-M sa suspected shabu ingon man cocain ug high grade marijuana sulo sa Catalina Inn, JR Borja Street ning syudad.
Kini epekto sa buy-bust operation sa maong yunit sa PNP batok sa 34 anyos nga si alyas Jun nga nagpuyo sa lungsod sa Bumbaran,Lanao del Sur ug alyas Hadji,29 anyos nga gikan pa sa Tanza, Cavite.
Namahayag si Police Regional Office 10 spokesperson Major Joann Navarro nga maoy nabawi sa tropa ni RDEU 10 chief Lt Col Demver Vergara ang 300 gramos sa shabu;200 gramos sa cocaine ug marijuana nga dunay kantidad sobra tres milyones pesos.
Gawas sa mga nakasulod selopin nga ilegal nga droga,nabawi usab sa tropa ang celphone,beltbag ug libo ka pesos nga buy-bust money atol sa operasyon.
Sa pagkutlo ning balita, detinado una sa Maharlika Detention Cell ang mga dinakpan samtang giandam ang tukmang kasong iduso sa piskalya ugmang adlawa.
Nasuta sa imbestigasyon nga dad-on unta sa Valencia City,Bukidnon ang kontrabando apan nasapon kini sa RDEU operatives sulod sa inn.
Kanhi na nag-atubang sa susamang kaso si alyas Jun tuig 2013 ug nakagawas sa 2022 samtang si alyas Hadji ang giingong unang higayon misulod sa kalihukan.
