CAGAYAN DE ORO CITY -Nagpadumdom sa laing higayon ang Bureau of Fire Protection sa katawhan nga kanunay’g igmat ug likayan ang pagdinanghag pag-abot sa pakig-away batok sa mga pag-ulbo sa sunog ning syudad.
Kini taliwala nga anaa sa puno nga schedules ang pipila ka sektor kay nagsingabot ang kapistahan sa dakbayan sa hinapos nga semana ning bulana.
Gihimo ni BFP-Cagayan de Oro District spokesperson SFO3 Imelda Barazan ang pasidaan nunot sa duha ka dagkon sunog nga miigo sa katawhan sa Zone 4-B,Tambo,Vamenta Boulevard,Brgy Carmen ug sa Bag-ong Dalan,Brgy Consolacion sa miaging Sabado.
Namahayag si Barazan nga nagsumikad ang kalayo sa mga pinuy-anan nga gipanag-iya nila ni Eric Binarao sa Brgy Carmen samtang iya usab ni Alexander Mercado ang sa Brgy Consolacion.
Hinoon,wala’y kinabuhi nga nakalas sa maong mga sunog samtang mitala sa inisyal nga structural damage nga sobra 3.5 milyones pesos.
Kasamtangang nagpasilong usab ang dul-an gatos ka pamilya sa brgy hall ug tunghaan sa magkalahing brgy gumikan sa hitabo.
Hisayrang dili usab mo-ubos sa 70 ka balay sa duha ka magkalahing sunog diin may tulo ka residente ilabina sa Brgy Carmen ang nagka-minor injuries.
