CAGAYAN DE ORO CITY – Nakabawi ang Police Regional Office 10 pinaagi sa ilang nagkadaiyang lower units sa sobra 517 gramos nga gitoohang shabu nga adunay kantidad nga 3.5 milyones pesos.
Nanulti si PRO 10 spokesperson Major Joann Navarro nga resulta kini sa ilang usa ka semana nga anti-criminality operations diin nag-resulta sa 195 ka indibidwal ang nadakpan ug 86 niini ang nalambigit sa ilegal nga droga.
Siya miingon nga sa gilusad usab nga 15 ka operasyon sa anti-illegal gambling campaign,anaa sa 36 ka tawo ang nadakpan ug nabawian sa sobra 32-mil pesos nga gambling items.
Anaa usab sa lima ka personalidad ang nadakpan sa pagkupot sa ilegal nga mga armas sa gihimo nga kontra boga operation.
Gawas niini,anaa usab sa 15-mil pesos ang balor sa smuggled cigarrettes ang nabawi ug laing 200-mil pesos nga balor sa ilegal mining paraphernalia ang nakompiskar sa mga otoridad.
Dugtong niini,nanganti si PRO 10 Director Brig Gen Jaysen De Guzman nga magpadayon ang kusganong kampanya batok sa tanang porma sa kreminalidad nga gipatuman sa mga kugihan nga tropa niini sa tibuok rehiyon.
