CAGAYAN DE ORO CITY – Detinado sa mini-cell sa kapolisan ang lima ka suspected illegal miners nga unang nadakpan sa hiniusang operasyon sa magkalahing brgy sa Opol,Misamis Oriental.
Namahayag si Misamis Oriental Police Provincial Office Director Col. Wilbur Salaguste nga maoy naglusad sa operasyon ang tropa sa Opol ug Manticao Police Stations kuyog ang Mines and Geosciences Bureau o MGB sa Brgy Cauyunan ug Brgy Limonda.
Aktong nasapon sa tropa ang unang upat ka personalidad nga sila alyas Albert,20 anyos;Channie,21 anyos; Kriza,23 anyos ug Shei-Shie,28 anyos nga pulos nagpuyo sa lungsod sa Opol.
Nakompiskar gikan sa mining site ang duha ka diesel engines;lima ka mill drums, 12 ball mill rods,atsa ug tulo ka sako sa minerals.
Sa follow up operation, nalusob usab sa tropa an Sitio Look sa Brgy Cauyunan diin nadiskobre ang illegal nga pagkalot sa yuta.
Nasapon ang 36 anyos nga si alyas Ibahi nga kamulo nga hagpat sa minerals.
Nakompiskar usab ang KOMATSU PC200 backhoe, duha ka water pumps,Stihl chainsaw, duha ka crowbars, wooden strainer nga adunay rubber matting hose,cellophane nga may sulod nga gitoohang gold flakes ug uban pa.
Gibana-bana nga ana sa P3.5-M ang nabawi nga illegal mining paraphernalia ug materials atol sa maong operasyon.
