CAGAYAN DE ORO CITY – Gisang-atan sa kapolisan sa kasong pagsupak sa Comprehensive Dangerous Drugs Act of 2002 ang upat ka dinakpan nga naglakip sa targeted high value individual sa piskalya sa Bukidnon.
Gibutyag sa Police Regional Office 10 Director Brig Gen Jaysen De Guzman nga nadakpan ang mga suspected pushers sa hiniusang operasyon sa Kalilangan Municipal Police Station,Provincial Drug Enforcement Unit, Regional Mobile Force Batallion 10 ug Philippine Drug Enforcement Agency 10 sa Purok 3,Brgy Kinura,Kalilangan.
Kabahin ang HIV target nga si alyas Mae Ann,37 anyos nga taga-Nangka Gredu,Panabo City,Davao del Norte ingon man si alyas Dan,49 anyos nga taga-Agusan del Norte,alyas Nisa nga gikan sa Tagum City ug alyas Bor nga taga-Davao del Norte.
Subay sa pagsaysay ni Kalilangan Municipal Police Station commander Capt Romeo Arcilla Jr nga maoy nabawi gikan sa mga dinakpan ang 530 gramos sa gitoohang shabu nga adunay kantidad nga 3.6 million pesos.
Gawas sa nakompiskar nga gitoohang shabu gikan sa mga dinakpan ang pribadong sakyanan diin sila nagsakay,daghang cellphones,pitaka,bags ug ubang ebedensiya.
Detinado una sa mini-cell ang mga dinakpan samtang gihulat ang mando sa korte nga isulod sa jail facility tungod sa maong kaso.
