CAGAYAN DE ORO CITY – Detinado ang lima ka personalidad nga nagmaneho sa nagkalai-laing sakyanan nga kargado sa suspected smuggled cigarettes dihang naharang sa road checkpoint operation sa hiniusang puwersa sa 51st Mechanized Company, 5th Mechanized Battalion, Armor Division sa AFP Patrol Base, Brgy. Rebucon, Nunungan Lanao del Norte.
Si Police Regional Office 10 Director Brig Gen Jaysen de Guzman miingon nga unang nasita ang wala na lang panganli nga mga dinakpan kay kadudahan ang ilang mga kargamento hangtod nga nasuta nga walay igong dokumento rason nga sila gipang-hold sa Nunungan Police Station.
Siya miingon nga tungod sa hugot nga koordinasyon sa mga sundalo ug kapolisan,napadali ang pagpugong sa mga kontrabando nga tinguha i-palusot sa mga sindikato sa rehiyon.
Anaa sa 226 ka reams sa nagkadaiyang klase sa sigarilyo ang nabawi sa mga sundalo gikan sa tulo ka sakyanan nga adunay balor sa 3 milyones pesos.
Gitugyan na sa Bureau of Customs Iligan City District ang mga nabawi nga mga kontrabando.
