CAGAYAN DE ORO CITY – Nabawi sa Bureau of Customs-Cagayan de Oro ang balor 30 milyon pesos nga smuggled cigarettes nga unang gi-deklarar sa nagtoong consignee nga personal effects nga gilakipan sa mga sapatos sa pagdunggo sa kargamento gikan sa China sa Mindanao Container Terminal sa Tagoloan,Misamis Oriental.
Mismo ang national intelligence agencies ang nagpindot kang BoC collector John Simon kabahin sa kargamento hinungdang gilayon giisa ang alert order batok sa container van nga gikargahan niini.
Miingon si BoC spokesperson Angelo Andrade sa paisunang pakisusi,gilayong misugat kanila ang kinarton nga mga peke nga sigarilyo nga gitabunan sa mga sapatos.
Gimanduan na karon ni Simon ang nagtoo nga consignee nga si Lorna Oftana nga mo-esplikar kon nganong dili siya angay kasuhan sa pagsupak sa Customs Modernization and Tariff Act ug ang pagbawi sa iyang kargamento pabor sa gobierno.
