CAGAYAN DE ORO CITY – Gidugmok sa laing higayon sa Bureau of Customs Cagayan de Oro sa pagpangulo ni Collector Atty Elvira Cruz ang balor sa 30 milyones nga smuggled cigarettes sa Digama Warehouse and Destruction Facility sa Brgy Bayabas ning syudad.
Kini human nasuta nga nakasupak sa Customs Modernization and Tariff Act in relation sa section 1400 o mas ilado nga mis-declaration sa imported goods nga gipasulod sa consignee nga si Lorna Oftana nga taga-General Santos City.
Miingon si Cruz nga unang midunggo ang 977 cigarettes master cases o 48-mil 850 ka reams sa pantalan sa Mindanao Container Terminal,Tagoloan,Misamis Oriental gikan sa abroad nga walay igong mga dokumento.
Kini ang hinungdan nga gikompiskar una ang kargamento sa miaging Mayo 20 ning tuiga samtang giimbestigaran diin nasuta nga walay igong papeles.
Kini na ang laing higayon nga gidugmok sa Customs ang mga kontrabando nga ilang nabawi gikan sa smugglers nga nagpalibot dinhi sa Northern Mindanao.
