CAGAYAN DE ORO CITY – Napiangan ang mga kalihukang ilegal sa mga tawong apil sa smuggling activities nga naglihok sa pipila ka bahin sa Northern Mindanao.
Kini human nabawi sa mga otoridad ang nagkadaiyang klase sa mga inismagol nga mga sigarilyo nga halos adunay balor sa 30 milyones pesos.
Gibutyag ni Police Regional Office 10 spokesperson Major Joann Navarro nga unang nag-operate ang tropa sa 1005th Mobile Company ubos sa Regional Mobile Force Batallion 10 kuyog ang Pantar Municipal Police Station diin naharang nila ang trak nga kargado sa nagkadaiyang klase sa sigarilyo nga nagkostar kapin 5 milyones pesos.
Nasikop ang 21 anyos nga si alyas Raffy nga nagpuyo sa Tugaya, Lanao del Sur.
Samtang wala nagpaulahi ang tropa sa Dangcagan Police Station diin naharang usab nila pinaagi sa checkpoint ang laing trak nga kargado gihapon sa mga sigarilyo sa Purok 1,Brgy Lourdes,Dangcagan.
Gikan daw sa Sultan Naga Dimaporo,Lanao del Norte ang kontrabando nga tuyo ipalusot sa duha ka tawo sa Cagayan de Oro City. Nakompiskar gikan sa mga dinakpan ang sobra 12 milyones pesos nga kantidad sa mga sigarilyo.
Sa pikas bahin, nasanta usab sa mga operatiba sa Damulog Police Station kuyog ang 2nd Provincial Mobile Force Company ingon man Regional Special Operations Unit 10 sa Brgy Omonay ang trak de karga nga nakasakay ang mga sigarilyo.
Nakompiskar ang 7.2 milyones pesos nga kantidad sa kontrabando gikan sa mga dinakpan nga sila alyas Ronie ug alyas Junel nga pulos nagpuyo sa Pagadian City.
Gipangkasuhan sa kapolisan ang mga dinakpan sa kasupakan sa Government Health Warning Law ug Intellectual Property Code apan gimanduan sila sa piskalya nga pabuhian ang lim ka dinakpan.
Kini tungod kay gitahasan sa balaod nga ang Bureau of Customs lang ang makaduso’g kaso sa batok sa mga responsabli.
