Subling gibirahan ni Misamis Oriental Governor Juliette Uy ang grupo sa mga trabahante sa kanhi administrasyon nga padayong nangdaut kaniya sa social media.
Sa gilusad nga Governor’s Report kagahapon, gibalik lantaw ni Uy ang mga panahon nga gibirahan siyag pandaut sa socmed kay wala makadawat sa suhulan ang mga empleyado ni kanhi Misamis Oriental Governor Peter Unabia.
Gitin-aw ni Uy nga wala siya sukad mibalos sa mga pagpangdaut kay sayud siya sa kahimtang nila nga napasagdan sa ilang amo.
Miingon si Uy nga dili kinaiya sa iyang administrasyon ang dili kabalo mubayad sa utang.
Gitumbok usab sa gobernador nga ang utang sa naglabay nga administrasyon maoy usa sa ilang dakung suliran nga hangtud karon, gipangitaan nilag pamaagi nga mabayran.
Usa sa iyang gihimong pananglitan ang minilyon nga kantidad sa mga catering sa naglabay nga tolo ka tuig. Subay sa report sa tresurera, aduna pay P30 million outstanding payables sa catering services si Unabia.
