CAGAYAN DE ORO CITY -Kasuhan sa Philippine Coast Guard o PCG-Northern Mindanao ang upat ka tawo nga nakuhaa’g P32 milyones cash nga gisulod sa mga karton diha sa pantalan sa Brgy Macabalan nga dad-on unta padulong sa Cebu City.
Kini human napakyas ang mga personahe sa United Coconut Planters’ Bank o UCPB nga makapresentar sa sertipikasyon gikan sa Bangko Sentral ng Pilipinas o BSP nga sila gitugutan nga makadala sa kadako sa kantidad sakay sa barko sa Trans Asia padulong Cebu City sa miaging Domingo sa gabii.
Gibutyag ni PCG Northern Mindanao District commander Capt Leo Panopio nga bugtong authorization letter lamang ang napresentar sa mga personahe sa UCPB sa mga otoridad hinungdan nga sila gipaubos sa imbestigasyon.
Samtang,dili pa madugtong sa PCG-Northern Mindanao kon may kalambigitan sa kagubot nga nahitabo sa Marawi City ang pagkabawi sa trantay-dos milyon pesos nga salapi sulod sa pantalan diha sa Brgy Macabalan sa syudad sa miaging Domingo sa gabii.
Kini samtang wala pa mohatag sa komento ang Bangko Sentral ng Pilipinas o BSP kon nakasubay ba sa ilang reglamento ang gihimo sa UCPB Velez Branch nga pagpagawas sa dakong salapi aron dad-on unta sa Cebu City.
Miingon si PCG Northern Mindanao District commander Capt Leo Panopio nga hulaton nila ang legal action sa
BSP aron mohaom usab ang ilang pag-imbestigar sa duha ka empleyado sa maong bangko ug laing duha ka mga guwaridya niini.
