CAGAYAN DE ORO CITY – Gisunog pinaagi sa crematorium facility sa Cosmopolitan Funeral Homes ang balor 35 milyones pesos nga klase-klaseng ilegal drugs nga nahukman sa nagkaiyang korte sa rehiyon.
Kini subay mando sa balaod nga dili na idugay ang maong mga droga gikan sa pagka-kompiskar sa mga dinakpan sa nagkadaiyang operasyon sa law enforcement agencies.
Gibutyag ni PDEA 10 regional director Jigger Montallana nga kabahin sa gipangsunog ang droga nga shabu,marijuana ug party drugs nga ecstasy.
Subay unta sa balaod,gilayong sunugon ang mga mabawi nga droga apan tungod sa kadaghan sa trabaho sa mga huwes,maabtan pa kini’g pila ka tuig.
Sa pikas bahin,giingong nag-ubos ang ihap sa mga politiko nga suspected narco-politician nga ubos sa monitoring sa PDEA-10 dinhi sa Northern Mindanao.
Kini human unang gilugwa kaniadto ni kanhi Pres Rodrigo Duterte nga may mga politiko nga utok sa pagpakaylap sa ilegal nga droga sa rehiyon.
Gibutyag ni Montallana nga miubos na lamang kini kay walay igong ebedensiya nga magtumbok kanila nga sila direkta nga anaa sa ilegal drug operations.
Apan giklaro usab sa opisyal nga wala kini nagpasabot nga mihunong na sila sa pagpaniid batok sa pipila ka govt officials nga anaa sa pasangil sa maong kalihukan.
