CAGAYAN DE ORO CITY, Philippines – Malampusong nasanta sa Philippine Drug Enforcement Agency (PDEA) ang gibana 28 kilogram sa marijuana nga adunay street value nga P39.6 million.
Subay sa report, gitago kining mga marijuana sulod sa usa container cargo sa Manila International Container Port (MICP).
Una niini, gipaubos sa X-ray procedure ang kuwestiyonabli nga container ug namapatud-an sa mga milangkob sa Bureau of Customs nga mga nirepak nga dahon sa marijuana ang sulod niini.
Mukabat sa 30 gikan sa 419 balik bayan boxes ang gisudlan sa maong kontrabando.
Subay sa nahuptang mga dokumento, ang mga balikbayan boxes nagsumikad sa Vancouver, Canada.
Miligid na ang imbestigasyon nga gilusad sa PDEA batok sa mismong shipper, sa receiver ug sa gigamit nga forwarding companies.
Nag-atubang ang mga nalambigit sa paglapas sa Republic Act 9165 o mas naila isip Comprehensive Dangerous Drugs Act of 2002.
Unang namahayag si Director Emerson Rosales, hepe sa PDEA National Capital Region nga ang importasyon sa gidili nga druga sa nasud nag-atubang sa sentensyang “life imprisonment” o tibook kinabuhi nga pagkapriso, lakip na ang pagpabayad sa monetary fine nga mubalor sa P500,000 – P10-Milyon.
